Пријатни летни одмори ви посакува
Заедницата на Македонските друштва во Швајцарија
со желби да моментите поминати со вашите блиски во вашите
родни места бидат радосни и незаборавни

 

---

Почитувани !

Ве покануваме на 37-мите Љубански иселенички средби и Фолк Фест Преспа 2010 година, што ќе се одржат од 31 јули до 02 август 2010 година во село Љубојно, под покровителство на Агенцијата за иселеништво на Република Македонија и одборот за прослава од село Љубојно.

Програмата ќе биде збогатена со 40 естрадни уметници, 3 народни оркестри, 3 фолкорни групи, Илинденски рецитал, вечери на поезијата, монодрама и народна веселба во текот на сите 3 дена. На Фолк Фест Преспа 2010 година, учество можат да земат и естрадни уметници, иселеници од Македонија. Доколку има заинтересирани ве молиме своето учество да го пријавите во Агенцијата за иселеништво на Република Македонија.

Директор
Васил Наумов

---

До сите македонски иселенички организации и асоцијации

Предмет: Покана за учество на Годишна конференција на иселеничките организации во Република Македонија

Почитувани,

Ми претставува особена чест и задоволство да ве поканам да земете учество на Годишната конференцијата на иселеничките организации, што ќе се одржи на 20 и 21 јули 2010 година во Клубот на пратеници, Скопје, во организација на Агенцијата за иселеништво на Република Македонија Дневен ред на Годишната конференција:

• Зачувување и негување на македонскиот јазик
• Зачувување и негување на македонската култура и традиција
• Можности и постапка за стекнување со државјанство на Република Македонија
• Остварување на избирачко право (право на глас)
• Договор за активности за утврдување на бројот на македонски иселеници
• Kонституирање на Иселеничкиот Совет Унапредување на врските со иселеничките организации

Молиме присуството на претставниците од вашата организација да го потврдите во Агенцијата за иселеништво најдоцна до 30 јуни 2010 година, на:
e-mail: info@minisel.gov.mk или
тел ++ 389 2 3 118 633
факс ++389 2 3 118 549

Со почит,
Директор Васил Наумов

---

Почитувани !

Согласно надлежноста на Агенцијата за иселеништво за помагањето на културниот развој на иселениците од Македонија, од оваа година Агенцијата за иселеништво, се вклучи во Програмата на Струшките вечери на поезијата, преку доделување на награда за поетите иселеници од Македонија. За таа цел Ве замолуваме да ги известите членовите на Вашата организација кои се занимаваат со пишување на литературни дела и кои имаат издадено книга, збирка поезија, да се пријават во Агенцијата за иселеништво. Книгите со кои ќе се конкурира ќе бидат оценети од страна на стручното жири на Струшките вечери на поезијата, а наградата за поетите иселеници од Македонија ќе ја додели Агенцијата за иселеништво на Република Македонија. Заинтересираните поети, иселеници од Македонија, своите дела треба да ги испратат во Агенцијата за иселеништво до крајот на месец мај 2010 година.

Директор
Васил Наумов

---

 

ВО МАРТ 2010 ГОДИНА СТАРТУВА ИЗДАВАЊЕТО
МАКЕДОНСКИ ПАТНИ ИСПРАВИ ВО ДИЈАСПОРАТА

1.3.2010

Соопштение на Владата на Република Македонија Владата на Република Македонија од март 2010 година започнува со реализација на активности, чија што цел е олеснување на можноста за нашите државјани кои што живеат во САД, Канада, Австралија и Европа, да се стекнат со новите македонски биометриски патни исправи.

За таа цел, Министерството за надворешни работи на Република Македонија ќе ја направи достапна можноста за аплицирање за македонски биометриски патни исправи, преку мобилни станици кои што ќе бидат поставени во македонските дипломатски претставништва во одделни градови во САД, Канада, Австралија и Европа. Целата постапка ќе се реализира согласно следната динамика:
- Сите македонски државјани кои се заинтересирани да поднесат барање за издавање на македонска биометриска патна исправа, потребно е најдоцна до 1 март 2010 година да го пријават својот интерес во дипломатско-конзуларните претставништва на Република Македонија во Детроит,Чикаго, Њујорк (САД), Канбера, Мелбурн (Австралија), Торонто (Канада), Бон (СР Германија) и Венеција (Италијанска Република).
- Македонските државјани кои барањето за издавање на биометриски пасош на Република Македонија ќе го поднесуваат во дипломатско–конзуларните претставништва во Минхен (СР Германија), Копенхаген (Кралство Данска), Берн (Швајцарска Конфедерација), Брисел (Кралство Белгија), Париз (Француска Република) и Лондон (Обединето Кралство на Велика Британија и Северна Ирска), потребно е својот интерес да го пријават во овие конзуларно-дипломатски претставништва најдоцна до 20 мај 2010 година.
- од 15 март до 16 април 2010 година ќе се врши прием на барања за издавање на македонски биометриски патни исправи во дипломатско -конзуларните претставништва на Република Македонија во Детроит, Торонто, Мелбурн и Бон, а изработените патни исправи ќе се врачуваат од 24 до 28 мај 2010 година.
- од 19 април до 14 мај 2010 година ќе се врши прием на барања за издавање на македонски биометриски патни исправи во дипломатско -конзуларните претставништва на Република Македонија во Чикаго, Њујорк, Канбера и Венеција, а изработените патни исправи ќе се врачуваат од 31 мај до 4 јуни 2010 година. - од 14 јуни до 9 јули 2010 година ќе се врши прием на барања за издавање на македонски биометриски патни исправи во дипломатско -конзуларните претставништва на Република Македонија во Минхен, Копенхаген, Берн, Брисел, Париз и Лондон, а изработените патни исправи ќе се врачуваат од 19 јули до 30 јули 2010 година. - Aктивностите за олеснување на можноста за стекнување со нови македонски биометриски патни исправи, ќе продолжат од септември 2010 година.

---